സംഘാടകസമിതിയോഗം

ജീണ്‍ 12 വെള്ളി,
     എം .എല്‍.എ ഫണ്ടില്‍നിന്നും സ്കൂളിന് ലഭിച്ച  പുതിയ കെട്ടിടത്തിന്റെ ഉദ്ഘാടനപരിപാടിയുമായി ബന്ധ-
പ്പെട്ട സംഘാടകസമിതിയോഗം വെള്ളിയാഴ്ച ഉച്ചയ്ക്ക്  2.30 ന്  സ്കൂളില്‍ ചേര്‍ന്നു. പള്ളിക്കര ഗ്രാമപഞ്ചായത്ത്
പ്രസിഡണ്ട്  ബഹു: ശ്രീ കുന്നൂച്ചി കുഞ്ഞിരാമന്‍ ,പഞ്ചായത്ത് മെമ്പര്‍മാരായ  ശ്രീ ടി നാരായണന്‍,ശ്രീമതി
 ബി .കൈരളി ,മുന്‍ മെമ്പരായ ശ്രീ രാഘവന്‍ വെളുത്തോളി,പി.ടി.എ പ്രസിഡണ്ട് ശ്രീ വി.രാഘവന്‍,നാട്ടിലെ പ്രമുഖ വ്യക്തികള്‍,കുടുംബശ്രീ അംഗങ്ങള്‍,പ്രവര്‍ത്തകസമിതി-മാതൃസമിതി അംഗങ്ങള്‍ ,വിവിധ ക്ലബ്ബ് ഭാരവാഹികള്‍,തുടങ്ങിയവര്‍ യോഗത്തില്‍ പങ്കെടുത്തു.ശ്രീ ടി.നാരായണന്റെ അധ്യക്ഷതയില്‍  സീനിയര്‍ 
അസിസ്റ്റന്റ്  ശ്രീ വാസുദേവന്‍മാഷ്  സ്വാഗതം പറഞ്ഞു. പഞ്ചായത്ത് പ്രസിഡണ്ട്  മുഖ്യഭാഷണം നടത്തി.
പൊതുവിദ്യാലയങ്ങള്‍ സംരക്ഷിച്ച്  നിലനിര്‍ത്തേണ്ടതിന്റെ ആവശ്യകതയും പ്രാധാന്യവും അദ്ദേഹം വ്യക്തമാക്കി. തുടര്‍ന്ന് ശ്രീ രാഘവന്‍ വെളുത്തോളി,ശ്രീമതി ബി.കൈരളി,ശ്രീ ടി.അശോക് കുമാര്‍,ശ്രീ വി.രാഘവന്‍ തുടങ്ങിയവര്‍ സംസാരിച്ചു. ചര്‍ച്ചകള്‍ക്കുശേഷം യോഗതീരുമാനങ്ങള്‍ വിശദീകരിച്ചു.
ശ്രീമതി പ്രേമലത പരിപാടിക്ക് നന്ദി പറഞ്ഞു.

എസ്.ആര്‍.ജി യോഗം

        ജൂണ്‍ 11 വ്യാഴം
          രാവിലെതന്നെ  ബി.ആര്‍.സി ട്രെയിനര്‍ ശ്രീ രാധാകൃഷ്ണന്‍സാര്‍ സ്കൂളില്‍ വന്നു.പ്രവര്‍ത്തനങ്ങള്‍
വിലയിരുത്തി. തുടര്‍ന്ന് എസ്.ആര്‍.ജി കണ്‍വീനര്‍ ശ്രീ വാസുദേവന്‍ മാഷിന്റെ അധ്യക്ഷതയില്‍ യോഗം
ചേര്‍ന്നു.ഓരോ ക്ലാസിലേയുംസ്ഥിതിയും പ്രശ്നങ്ങളും ചര്‍ച്ചചെയ്യുകയും അധ്യാപകര്‍ക്ക്  ആവശ്യമായ നിര്‍-
ദ്ദേശങ്ങള്‍ തരികയും ചെയ്തു.

പരിസ്ഥിതി ദിനാചരണം

       ജൂണ്‍ 5 ലോകപരിസ്ഥിതിദിനം 
              രാവിലെ തന്നെ സ്കൂള്‍ അസംബ്ലി കൂടി. പരിസ്ഥിതിദിനത്തിന്റെ പ്രാധാന്യത്തെകുറിച്ചും നമ്മുടെ 
പരിസ്ഥിതിയെ നാം സംരക്ഷിക്കേണ്ടതിന്റെ ആവശ്യകതയെ കുറിച്ചും അധ്യാപകര്‍ കുട്ടികളോട് സംസാരിച്ചു.
ഉച്ചയ്ക്കുശേഷം പ്രത്യേകബാലസഭയില്‍ കുട്ടികള്‍ക്ക് ക്വിസ് മത്സരം സംഘടിപ്പിച്ചു. തുടര്‍ന്ന്  കുട്ടികള്‍ക്ക്  വൃക്ഷത്തൈകള്‍ വിതരണം ചെയ്തുകൊണ്ടും സ്കൂള്‍വളപ്പില്‍ വൃക്ഷത്തൈ നട്ടുകൊണ്ടും പി.ടി.എ പ്രസിഡണ്ട്
ശ്രീ വി.രാഘവന്‍ ദിനാചരണം  ഔപചാരികമായി ഉദ്ഘാടനം ചെയ്തു.

പ്രവേശനോത്സവം

             പ്രവേശനോത്സവം  2015-16
  ഈ വര്‍ഷത്തെ പ്രവേശനോത്സവം വളരെ വിപുലമായിത്തന്നെ ഞങ്ങള്‍ ആഘോഷിച്ചു.നാട്ടുകാരുടേയും
,തരംഗം,ചെഗ്വേര തുടങ്ങിയ ക്ലബ് അംഗങ്ങളുടേയും പഞ്ചായത്ത് പ്രതിനിധികളുടേയും നാട്ടിലെ മറ്റു പ്രമുഖരുടേയും രക്ഷിതാക്കളുടേയും നിറസാന്നിദ്ധ്യം  പരിപാടിയെ നാടിന്റെ ഉത്സവമാക്കി മാറ്റി.രാവിലെ
പത്തുമണിയോടെതന്നെ അറിവിന്റെ അക്ഷരലോകത്തേക്ക്  പ്രവേശിക്കുന്ന കൊച്ചുകുരുന്നുകള്‍ക്കുള്ള
വരവേല്‍പ്പായിരുന്നു. ബലൂണുകളും,മധുരപലഹാരങ്ങളും നല്‍കി  കടലാസ്  തൊപ്പിയണിയിച്ചുകൊണ്ട്
പ്രവേശനോത്സവഗാനം പാടി,കൈകൊട്ടി ആര്‍പ്പുവിളിച്ചു കൊണ്ട് കൊച്ചുകൂട്ടുകാരെ സ്കൂളിലേക്ക്  
ആനയിച്ചു.ബേക്കല്‍ ഉപജില്ലാവിദ്യാഭ്യാസ  ഓഫീസര്‍  ശ്രീ രവിവര്‍മന്‍ സാറിന്റേയും പള്ളിക്കര ഗ്രാമപഞ്ചായത്ത്  മെമ്പര്‍മാരായ  ശ്രീ ടി.നാരായണേട്ടന്റേയും ശ്രീമതി  ബി.കൈരളിയുടേയും 
സാന്നിദ്ധ്യം വരവേല്‍പ്പിന് മാറ്റുകൂട്ടി.തുടര്‍ന്ന്  നടന്ന യോഗത്തില്‍ പ്രാര്‍ഥനയ്ക്കുശേഷം സ്കൂള്‍ ഹെഡ്മിസ്ട്രസ്
ശ്രീമതി പി.ബേബി സ്വാഗതം പറഞ്ഞു. വാര്‍ഡ് മെമ്പര്‍ ശ്രീമതി  പി.ഗംഗയുടെ അധ്യക്ഷതയില്‍ ശ്രീ ടി.നാരായണന്‍ കുട്ടികള്‍ക്കുള്ള പഠനോപകരണങ്ങള്‍ വിതരണം ചെയ്തു. തരംഗം ക്ലബ് വക  കുട്ടികള്‍ക്ക്

ബേഗ്, പി.ടി.എ വക നോട്ടുബുക്ക്,അധ്യാപകരുടെ വകയായി സ്ലേറ്റ്,ക്രയോണ്‍സ്  എന്നിവയും കുട്ടികള്‍ക്ക് വിതരണം  ചെയ്തു. തുടര്‍ന്ന് ശ്രീ പി.ബാലകൃഷ്ണന്‍,ശ്രീ പി.നാരായണന്‍,ശ്രീ അശോക് കുമാര്‍ ,ശ്രീ അജിത്,ശ്രീ വി.രാഘവന്‍,ശ്രീ രൂപേഷ് ,ശ്രീ ജി.അംബുജാക്ഷന്‍ മാസ്റ്റര്‍ തുടങ്ങിയവരും  പരിപാടിക്ക് ആശംസകള്‍ അര്‍പ്പിച്ച് സംസാരിച്ചു. ശ്രീ വാസുദേവന്‍  നമ്പൂതിരി  പരിപാടിക്ക്  നന്ദി പറഞ്ഞു. തുടര്‍ന്ന്  നാട്ടിലെ കലാകാരനായ ശ്രീ ഹരീശന്റെ വകയായി  കുട്ടികള്‍ക്ക്  പാല്‍പ്പായസവും  വിതരണം ചെയ്തു.

പി.ടി.എ എക്സിക്ക്യൂട്ടീവ് യോഗം

           2015 മെയ്  24 ന് ഞായറാഴ്ച  ഉച്ചയ്ക്ക് 2.30 ന്  സ്കൂളില്‍വെച്ച്  പി.ടി.എ യോഗം നടന്നു.
സ്കൂള്‍  പ്രവേശനോത്സവം  എന്നതായിരുന്നു പ്രധാന അജണ്ട .കമ്മിറ്റി അംഗങ്ങളും  പഞ്ചായത്ത് മെമ്പര്‍
ശ്രീ.ടി.നാരായണേട്ടനും യോഗത്തില്‍  പങ്കെടുത്തു.പി.ടി.എ പ്രസിഡണ്ട്  ശ്രീ.വി.രാഘവന്‍ അധ്യക്ഷം
വഹിച്ചു. ഹെഡ്മിസ്ട്രസ്  ശ്രീമതി  പി.ബേബി ടീച്ചര്‍  സ്വാഗതം പറഞ്ഞു.എല്ലാ ക്ലബ്ബുകാരേയും രക്ഷിതാക്കളേയും
നാട്ടുകാരേയും സഹകരിപ്പിച്ചുകൊണ്ട്  പ്രവേശനോത്സവം  വളരേഭംഗിയായി  ആഘോഷിക്കാന്‍ തീരുമാനമായി.അതിന്റെ ഭാഗമായി  സ്കൂളും ചുറ്റുപാടും വൃത്തിയാക്കാനും  തീരുമാനമായി.

മികവ് പ്രദര്‍ശനവും വാര്‍ഷികാഘോഷവും

31.03.2015, ചൊവ്വ

2014-15 വര്‍ഷത്തില്‍ സ്കൂളില്‍ നടന്ന പഠനപ്രവര്‍ത്തനങ്ങളുടെ ഭാഗമായി കുട്ടികളിലുണ്ടായ

മികവിന്റെ ഉല്‍പന്നങ്ങള്‍ രാവിലെ പത്തുമണിമുതല്‍ പ്രത്യേകം സജ്ജമാക്കിയ ക്ലാസ് മുറിയില്‍ പ്രദര്‍ശനത്തിനു വെച്ചു. സ്കൂളിലെ പൂര്‍വ്വ വിദ്യാര്‍ഥിയായ സുകുമാരന്‍ സ്വന്തം കരവിരുതില്‍ ചിരട്ട,ചകിരി തുടങ്ങിയ പാഴ്വസ്തുക്കളില്‍ നിര്‍മിച്ച മനോഹരശില്‍പങ്ങളും തദവസരത്തില്‍ പ്രദര്‍ശനത്തിനു വെച്ചിരുന്നു. ബി.ആര്‍.സി ട്രെയിനര്‍മാരായ ശ്രീ.രാധാകൃഷ്ണന്‍ മാസ്റ്റര്‍, ശ്രീ.ശശി മാസ്റ്റര്‍ എന്നിവര്‍ രാവിലെതന്നെ പ്രദര്‍ശനം കണ്ട് വിലയിരുത്താന്‍ സ്കൂളില്‍ എത്തിയിരുന്നു. കുട്ടികളുടെ ഉല്‍പന്നങ്ങള്‍ പരിശോധിച്ച് വളരെനല്ല അഭിപ്രായമാണ് വിസിറ്റ് ബുക്കില്‍ രേഖപ്പെടുത്തിയിരിക്കുന്നത്. വൈകുന്നേരത്തോടെ പള്ളിക്കരഗ്രാമപഞ്ചായത്ത് പ്രസിഡണ്ട് ശ്രീ.കുന്നൂച്ചി കുഞ്ഞിരാമന്‍,മെമ്പര്‍മാരായ ശ്രീ.ടി.നാരായണന്‍, ശ്രീമതി.പി.ഗംഗ, ശ്രീമതി.ബി.കൈരളി ,ബേക്കല്‍ എ.ഇ.ഒ ശ്രീ.രവിവര്‍മ്മന്‍ സാര്‍,ബി.പി.ഒ ശ്രീ.ശിവാനന്ദന്‍ മാസ്റ്റര്‍ ,രക്ഷിതാക്കള്‍ ,നാട്ടുകാര്‍ തുടങ്ങി ഒരുപാട് ആളുകള്‍ പ്രദര്‍ശനം കാണാന്‍ എത്തിയിരുന്നു.

             വൈകുന്നേരം 05.30 തോടെ വാര്‍ഷികാഘോഷത്തിന്റെ ഭാഗമായി നടത്തുന്ന കലാപരിപാടികളുടേയും മികവുപ്രദര്‍ശനത്തിന്റേയും ഉദ്ഘാടനകര്‍മം വാര്‍ഡ് മെമ്പര്‍ ശ്രീമതി പി. ഗംഗയുടെ
അധ്യക്ഷതയില്‍ ഗ്രാമപഞ്ചായത്ത് പ്രസിഡണ്ട് ശ്രീ. കുന്നൂച്ചി കുഞ്ഞിരാമന്‍ ഉദ്ഘാടനം ചെയ്തു. സ്കൂള്‍ ഹെഡ്മിസ്ട്രസ് ശ്രീമതി പി.ബേബി ചടങ്ങിന് സ്വാഗതം ആശംസിച്ചു സംസാരിച്ചു. എ.ഇ.ഒ ശ്രീ.രവിവര്‍മ്മന്‍സാര്‍ കുട്ടികള്‍ക്കുള്ള കേഷ് അവാര്‍ഡുകളും,സര്‍ട്ടിഫിക്കറ്റുകളും,സമ്മാനങ്ങളും വിതരണം
ചെയ്തു. ശ്രീ.ടി.നാരായണന്‍,ശ്രീമതി.ബി.കൈരളി,ശ്രീ.പി.ബാലകൃഷ്ണന്‍,ശ്രീ.ശിവാനന്ദന്‍ മാസ്റ്റര്‍,ശ്രീ.രൂപേഷ്, ശ്രീ.വിനോദ്, ശ്രീ.വി.രാഘവന്‍,ശ്രീ.അംബുജാക്ഷന്‍ മാസ്റ്റര്‍ തുടങ്ങിയവര്‍ പരിപാടിക്ക് ആശംസകള്‍ അര്‍പ്പിച്ച് സംസാരിച്ചു. ശ്രീ.വാസുദേവന്‍ മാസ്റ്റര്‍ ചടങ്ങിന് നന്ദി രേഖപ്പെടുത്തി സംസാരിച്ചു.
തുടര്‍ന്ന് കുട്ടികളുടെ കലാപരിപാടികള്‍ ആരംഭിച്ചു.രംഗപൂജ,ഗ്രൂപ്പ് ഡാന്‍സ്,ഒപ്പന,കൊയ്ത്ത് ഡാന്‍സ്,മയിലാട്ടം,തെയ്യം,മുച്ചിലോട്ടമ്മ,നാടോടിനൃത്തം,നാടന്‍പാട്ട്,ദേശഭക്തിഗാനം,ഇംഗ്ലീഷ് സ്കിറ്റ്,ഇംഗ്ലീഷ് പാട്ട്,വന്ദേമാതരം, അമ്മമാരുടെ തിരുവാതിര ,മംഗലംകളി തുടങ്ങിയ കലാരൂപങ്ങള്‍ വേദിയില്‍ അവതരിപ്പിച്ചു.

ജനറല്‍ബോഡിയോഗം

16.03.2015,തിങ്കള്‍
        ഉച്ചയ്ക്ക് രണ്ടു മണിക്ക്  സ്കൂളില്‍ പി.ടി.എ ജനറല്‍ബോഡിയോഗം നടന്നു. മികവുപ്രദര്‍ശനവും  സ്കൂള്‍വാര്‍ഷികാഘോഷവും എന്നതായിരുന്നു പ്രധാന അജണ്ട. പി.ടി.എ പ്രസിഡണ്ട് ശ്രീ.വി.രാഘവന്റെ അധ്യക്ഷതയില്‍ സ്കൂള്‍ഹെഡ് മിസ്ട്രസ് ശ്രീമതി.പി.ബേബി സ്വാഗതം പറഞ്ഞു. വാര്‍ഡ് മെമ്പര്‍മാരായ ശ്രീ.ടി.നാരായണന്‍, ശ്രീമതി .പി.ഗംഗ, രക്ഷാകര്‍ത്താക്കള്‍ അധ്യാപകര്‍ എന്നിവര്‍ പങ്കെടുത്തു. വാര്‍ഷികപരീക്ഷ കഴിഞ്ഞ് 31.03.2015 ന്  മികവ് പ്രദര്‍ശനവും വാര്‍ഷികാഘോഷവും നടത്താന്‍ യോഗം തീരുമാനിച്ചു. പരിപാടിയുടെ പൂര്‍ണ ഉത്തരവാദിത്വം  രക്ഷാകര്‍തൃസമിതിയും മാതൃസമിതിയും ഏറ്റെടുത്തു.ഉദ്ഘാടനത്തിന്  പള്ളിക്കരഗ്രാമ പഞ്ചായത്ത് പ്രസിഡണ്ടിനെ ക്ഷണിക്കാനും,ബ്ലോക്ക് പഞ്ചായത്ത് മെമ്പര്‍,വിദ്യാഭ്യാസ സ്റ്റാന്റിങ് കമ്മിറ്റി ചെയര്‍മാന്‍,പഞ്ചായത്ത് മെമ്പര്‍മാര്‍ ,ഉപജില്ലാവിദ്യാഭ്യാസ ഓഫീസര്‍,ബി.പി.ഒ, ക്ലബ് ഭാരവാഹികള്‍,നാട്ടുകാര്‍ എന്നിവരേയും പരിപാടിക്ക് ക്ഷണിക്കാനും യോഗത്തില്‍ തീരുമാനമായി.മാതൃസമിതി പ്രസിഡണ്ട് ശ്രാമതി ഓമനകുമാരി നന്ദി പറഞ്ഞതോടെ 4.15ന്  യോഗം പിരിച്ചുവിട്ടു.