ഡ്രൈ ഡേ

         ലോക കൈ കഴുകല്‍ ദിനമായ 15.10.2015 ന് ഉച്ചയ്ക്ക് ശേഷം  മൂന്നാം ക്ലാസിലെ വൃത്തി നമ്മുടെ ശക്തി എന്ന പാഠഭാഗവുമായി ബന്ധപ്പെടുത്തി  സ്കൂള്‍ പരിസരം ശുചീകരിച്ചുകൊണ്ട്  കുട്ടികള്‍ ഡ്രൈ ഡേ ആചരിച്ചു. കുട്ടികള്‍ സ്കൂള്‍ പറമ്പിലെ എല്ലാവിധ മാലിന്യങ്ങളും നീക്കം ചെയ്തു. കൂടാതെ ഇനിമുതല്‍ എല്ലാ വ്യാഴാഴ്ചയും  സ്കൂളിലും എല്ലാ ഞായറാഴ്ചയും  അവരവരുടെ വീടുകളിലും ഡ്രൈ ഡേ ആചരിക്കുമെന്ന്  കുട്ടികള്‍ സ്വയം തീരുമാനമെടുത്തു.

ലോക കൈകഴുകല്‍ ദിനം,ലോക വിദ്യാര്‍ഥിദിനം

രാവിലെ 9.30 ന്  സ്കൂള്‍ അസംബ്ലി കൂടി. ദിനാചരണത്തിന്റെ പ്രത്യേകതകള്‍,പ്രാധാന്യം എന്നിവ കുട്ടികളെ ബോധ്യപ്പടുത്തി. സ്കൂള്‍ ഹെഡ് മിസ്ട്രസ്  ശ്രീമതി രാജേശ്വരി ടീച്ചര്‍ കുട്ടികളെ അഭിസംബോധനചെയ്ത്  സംസാരിച്ചു. രോഗങ്ങളുടെ കലവറയായ ഇന്നത്തെ കാലത്ത്  കൈ കഴുകല്‍ ദിനത്തിന്റെ പ്രാധാന്യത്തെകുറിച്ചും ശുചിത്വം പാലിക്കേണ്ടതിന്റെ ആവശ്യകത എന്താണെന്നതിനെകുറിച്ചും ടീച്ചര്‍ കുട്ടികളോട് സംസാരിച്ചു. കൂടാതെ ഇന്നത്തെ ദിനത്തിന്റെ മറ്റൊരു പ്രത്യേകതയായ ലോകവിദ്യാര്‍ഥിദിനത്തെകുറിച്ചും അന്തരിച്ച മുന്‍ രാഷ്ട്രപതി ശ്രീ എ.പി.ജെ അബ്ദുള്‍ കലാമിനെ കുറിച്ചും ടീച്ചര്‍ കുട്ടികളെ ഓര്‍മിപ്പിച്ചു. തുടര്‍ന്ന് ശ്രീ വാസുദേവന്‍മാഷിന്റെ നേതൃത്വത്തില്‍ കുട്ടികളും അധ്യാപകരും സൈബര്‍ സുരക്ഷാ പ്രതിജ്ഞയെടുത്തു. തുടര്‍ന്ന് ആരോഗ്യപരിപാലനത്തില്‍ ശുചിത്വത്തിനുള്ള പ്രാധാന്യം എന്താണെന്നും  നാം പാലിക്കേണ്ട ശുചിത്വ ശീലങ്ങള്‍ എന്തൊക്കെയാണെന്നും ശ്രീമതി പ്രേമലത ടീച്ചര്‍ കുട്ടുകള്‍ക്ക് പറഞ്ഞുകൊടുത്തു.
            കൈ കഴുകല്‍ ദിനത്തില്‍ കൈ കഴുകലിന്റെ ഏഴു ഘട്ടങ്ങള്‍ എന്തൊക്കെയാണെന്ന്  വിശദീകരിച്ചുകൊണ്ട്  സ്കൂള്‍ ഹെല്‍ത്ത് നഴ്സ് ശ്രീമതി കെ ഓമന ഒരു ബോധവല്ക്കരണക്ലാസുതന്നെ  കുട്ടികള്‍ക്ക് എടുത്തു കൊടുത്തു. തുടര്‍ന്ന് എല്ലാ കുട്ടകളും അധ്യാപകരും  നഴ്സ് ഓമനയുടെ നേതൃത്വത്തില്‍  ഏഴ്  കൈ കഴുകല്‍ ഘട്ടങ്ങള്‍ പാലിച്ചുകൊണ്ടുതന്നെ  കൈ കഴുകി , പ്രതിജ്ഞയെടുത്തു. പരിപാടിയില്‍ ഉടനീളം പി.ടി.എ പ്രസിഡണ്ട്  ശ്രീമതി ഓമനയുടെ സാന്നിധ്യവും ഉണ്ടായിരുന്നു. 11.30  മുതല്‍ ശ്രീമതി ഹേമടീച്ചറുടെ നേതൃത്വത്തില്‍  ശുചിത്വം എന്ന വിഷയത്തില്‍  ചിത്രരചനാ,പോസ്റ്റര്‍രചനമത്സരങ്ങളും നടന്നു.  മത്സരത്തില്‍  അഖില്‍ ചന്ദ്രന്‍, ഫാത്തിമത്ത് സഹ് ല,നയന.കെ, റസ്മീന കെ എന്നിവര്‍  സമ്മാനാര്‍ഹരായി.

ഗാന്ധിജയന്തി ദിനം

ഒക്ടോബര്‍ 2 ഗാന്ധിജയന്തി  സ്കൂളില്‍ സമുചിതമായി ആഘോഷിച്ചു. രാവിലെതന്നെ കുട്ടികള്‍ക്ക് അസംബ്ലി നടത്തി. എച്ച്.എം അസംബ്ലിയെ അഭിസംബോധനചെയ്ത് സംസാരിച്ചു. എല്ലാവരും ചേര്‍ന്ന് സ്കൂള്‍ പരിസരം വൃത്തിയാക്കി. കുട്ടികള്‍ക്ക് മധുരം വിതരണം ചെയ്തു.കൃഷിഭവന്‍ മുഖേന ലഭിച്ച പച്ചക്കറി വിത്തുകളും കുട്ടികള്‍ക്ക് വിതരണം ചെയ്തു.

വയോജനദിനാചരണം

      ഒക്ടോബര്‍ 01, ലോകവയോജനദിനം  സ്കൂളില്‍ വിപുലമായി ആഘോഷിച്ചു. സ്കൂളില്‍ നിന്നും മുന്‍പ് വിരമിച്ച രണ്ട് പ്രധാന അധ്യാപകരെ ആദരിക്കല്‍ ചടങ്ങായിരുന്നു പ്രധാനം. രാവിലെ 11 മണിക്ക് പ്രാര്‍ഥനയോടെ യോഗം ആരംഭിച്ചു. പി.ടി.എ പ്രസിഡണ്ട്  ശ്രീമതി ഓമനകുമാരിയുടെ അധ്യക്ഷതയില്‍  സ്കൂള്‍ ഹെഡ് മിസ്ട്രസ് ശ്രീമതി രാജേശ്വരി ടീച്ചര്‍ സ്വാഗതം പറഞ്ഞു.വാര്‍ഡ് മെമ്പര്‍ ശ്രീമതി പി ഗംഗ ആശംസകള്‍ നേര്‍ന്ന് സംസാരിച്ചു. തുടര്‍ന്ന് മുന്‍ ഹെഡ് മാസ്റ്റര്‍ ശ്രീ കുഞ്ഞിരാമന്‍മാഷിനെ ശ്രീമതി പി ഗംഗയും  മുന്‍ ഹെഡ് മിസ്ട്രസ് ശ്രീമതി ഭാര്‍ഗ്യവിടീച്ചറിനെ എച്ച്.എം ശ്രീമതി രാജേശ്വരിടീച്ചറും  പൊന്നാട അണിയിച്ച്  ആദരിച്ചു. ശ്രീ വാസുദേവന്‍ മാഷും ശ്രീമതി പ്രേമലതടീച്ചറും ആശംസകള്‍ അര്‍പ്പിച്ച് സംസാരിച്ചു.  ആദരിക്കപ്പെട്ടവരുടെ മറുപടിപ്രസംഗത്തിനുശേഷം  ശ്രീമതി ഹേമടിച്ചര്‍ ചടങ്ങിന് നന്ദി പറഞ്ഞു.കുട്ടികളുടേയും രക്ഷിതാക്കളുടേയും സാന്നിധ്യം ചടങ്ങ് മികവുറ്റതാക്കി.ചടങ്ങില്‍ വയോജനദിന പ്രതിജ്ഞയെടുത്തു.

ഓണാഘോഷം

21.08.2015  വെള്ളി
സ്കൂളില്‍ ഓണപ്പരിപാടി ഗംഭീരമായി ആഘോഷിച്ചു.രാവിലെ തന്നെ കുട്ടികള്‍ വര്‍ണപ്പൂക്കളുമായി സ്കൂളിലെത്തി.
ഓരോ ക്ലാസിലും കുട്ടികള്‍ മത്സരിച്ച് പൂക്കളമൊരുക്കി.ഓണക്കളികളും പാട്ടുകളും ഒക്കെയായി ആനന്ദത്തിലായിരുന്നു.അമ്മമാരും  അദ്യാപകരും നാട്ടുകാരും ചേര്‍ന്ന്  വിഭവസമൃദ്ധമായ ഓണസദ്യ ഒരുക്കി.
പപ്പടവും പാല്‍പ്പായസവും കൂട്ടി സദ്യയുണ്ട കുട്ടികള്‍ ഓണാഘോഷം നന്നായി ആസ്വദിച്ചു.

സ്വാതന്ത്ര്യദിനാഘോഷം

    15.08.2015  ,ശനി 
ഈ വര്‍ഷത്തെ  സ്വാതന്ത്ര്യദിനം സമുചിതമായി ആഘോഷിച്ചു. പ്രധാന അധ്യാപികയുടെ അഭാവത്തില്‍ സീനിയര്‍ അസിസ്റ്റന്റ്  ശ്രീ  വാസുദേവന്‍മാഷ്  രാവിലെ അസംബ്ലിയില്‍ പതാക ഉയര്‍ത്തി. തുടര്‍ന്ന് നടന്ന പൊതുയോഗത്തില്‍ വാസുദേവന്‍ മാഷ്  സ്വാഗതം ആശംസിച്ചു.പി.ടി.എ പ്രസിഡണ്ട്  ശ്രീമതി ഓമനകുമാരിയുടെ അധ്യക്ഷതയില്‍ യോഗം ആരംഭിച്ചു. മെമ്പര്‍ ശ്രീ ടി. നാരായണന്‍ ,മുന്‍ എച്ച്.എം ശ്രീമതി ഭാര്‍ഗ്യവി ടീച്ചര്‍,വിവിധക്ലബ്  ഭാരവാഹികള്‍,ശ്രീമതി ഹേമ വി.പി തുടങ്ങിയവര്‍ ആശംസകള്‍ അര്‍പ്പിച്ച് സംസാരിച്ചു.തുടര്‍ന്ന് കഴിഞ്ഞ അധ്യയനവര്‍ഷത്തില്‍ സ്കൂളിലെ നാലാം ക്ലാസില്‍ നിന്നും ഏറ്റവും മികച്ച മാര്‍ക്ക് കരസ്ഥമാക്കിയ അശ്വതി എ.വി എന്നകുട്ടിക്ക്  സന്നദ്ധസംഘടനയായ  സൗഹൃദവേദി പാക്കം വകയായി എന്റോവ്മെന്റും കാഷ് അവാര്‍ഡും സര്‍ട്ടിഫിക്കറ്റും വിതരണം ചെയ്തു. സംഘടനാ പ്രോഗ്രാംകമ്മിറ്റി അംഗങ്ങളായ ശ്രീ വിനോദ്കുമാര്‍,ശ്രീ രാജന്‍ എന്നിവരും സന്നിഹിതരായിരുന്നു.മാതൃസമിതി പ്രസിഡണ്ട് ശ്രീമതി ടി. ഗിരിജ പരിപാടിക്ക്  നന്ദി പറഞ്ഞു. കുട്ടികള്‍ക്ക് മിഠായി വിതരണം നടത്തി. തുടര്‍ന്ന് കുട്ടികളുടെ കലാപരിപാടികള്‍ നടന്നു. ഉച്ചയ്ക്ക് 12 മണിയോടെ കുട്ടികള്‍ക്ക്  പായസവിതരണവും നടത്തി.

ആരോഗ്യബോധവല്‍ക്കരണക്ലാസ്

      11.08.2015, ചൊവ്വ 
രാവിലെ  11 മണിക്ക് സ്കൂളില്‍ ജനറല്‍ബോഡിയോഗം നടന്നു. ആരോഗ്യബോധവല്‍ക്കരണം എന്നതായിരുന്നു പ്രധാന അജണ്ട. ഹെഡ് മിസ്ട്രസ്  ശ്രീമതി രാജേശ്വരി ടീച്ചര്‍ പരിപാടിക്ക് സ്വാഗതം ആശംസിച്ച്  സംസാരിച്ചു.
പി.ടി.എ പ്രസിഡണ്ട്  ശ്രീമതി  ഓമനകുമാരി ചടങ്ങില്‍ അധ്യക്ഷത വഹിച്ചു. തുടര്‍ന്ന്  പള്ളിക്കര പി.എച്ച്.സി
ഹെല്‍ത്ത്  ഇന്‍സ്പെക്ടര്‍ സ്കൂളിലെ കുട്ടികളേയും രക്ഷിതാക്കളേയും ഉള്‍പ്പെടുത്തിക്കൊണ്ട്  ക്ലാസ് ആരംഭിച്ചു.
അനുദിനം  വര്‍ദ്ധിച്ചുവരുന്ന പകര്‍ച്ചവ്യാധികളെകുറിച്ചും അവയുടെ കാരണങ്ങളെകുറിച്ചും പിടിപെടാതിരിക്കാന്‍ നാം ശ്രദ്ധിക്കേണ്ട കാര്യങ്ങളെകുറിച്ചും വിശദവും വ്യക്തവുമായിരുന്നു ക്ലാസ്. ഏറ്റവും പ്രധാനപ്പെട്ട കാര്യം ശുചിത്വം പാലിക്കുക എന്നതാണെന്നും അദ്ദേഹം വ്യക്തമാക്കി.ഏകദേശം 45 മിനുട്ടോളം സംശയങ്ങളും സംശയനിവാരണങ്ങളും ചര്‍ച്ചകളും ഒക്കെയായി ക്ലാസ്  നീണ്ടുനിന്നു. തുടര്‍ന്ന്  സ്വാതന്ത്ര്യദിനാഘോഷം,ഓണപ്പരിപാടി  എന്നിവ കൊണ്ടാടുന്നതിനുവേണ്ടിയുള്ള ആലോചനകള്‍ക്കുശേഷം
12.30 ഓടെ യോഗം അവസാനിച്ചു. സ്റ്റാഫ്  സെക്രട്ടറി ശ്രീ വാസുദേവന്‍മാഷ് പരിപാടിക്ക് നന്ദി പറഞ്ഞു.